உடனுக்குடன் செய்திகளை அறிந்துகொள்ள எமது முகநூலில் இணைந்து கொள்ளுங்கள்.

''என் இதயத்தை அப்பாவுக்கு கொடுங்கள்'' 59 வயசு ஆளுடன் பழகி ஏமாந்த இளம்பெண் தற்கொலை!

பெண் பிள்ளைகளுக்கும் தந்தைக்குமான உறவு மிகுந்த அன்பினாலும், தியாகத்தாலும் கட்டமைக்கப்பட்டிருக்கும். பிள்ளைகளுக்காக ஒரு தந்தை எத்தனையோ தியாகங்களை செய்து வரும் சூழலில் தந்தைக்காக ஒரு மகள் தனது உயிரையும் மாய்த்துக்கொண்ட சம்பவம் சோகத்தை ஏற்படுத்தியுள்ளது.

​2019 இல் நடந்த சம்பவத்தின் எதிரொலி

சென்னை திருவொற்றியூர் சாத்துமா நகரைச் சேர்ந்தவர் பாஸ்கர். இவரது மகள் பவித்ரா (24). பி.காம் படித்துள்ள பவித்ராவுக்கு அவரது தோழியின் தந்தை அம்மன் சேகர் (59) என்பவருடன் பழக்கம் ஏற்பட்டது. பாஸ்கரின் வீட்டுக்கு அவ்வப்போது வந்து செல்லும் சேகர் பவித்ராவுடன் நெருங்கி பழகி வந்துள்ளார். பிறந்த நாள், விஷேஷ நாட்களில் பவித்ராவுக்கு கிஃப்ட் பொருட்களை வாங்கி கொடுத்து சந்தோசப்படுத்தியுள்ளார் சேகர். சில நாட்கள் கடந்த பிறகு பவித்ரா மீதான காதலை வெளிப்படுத்திய சேகர் பாலியல் ரீதியாகவும் அணுகியுள்ளார்.

எனினும் இதை கண்டிக்காமல் விட்ட பவித்ரா சேகருடன் நெருக்கமாக பழக ஆரம்பித்தார். அதன் தொடர்ச்சியாக இருவரும் பல இடங்களில் சுற்றி வந்துள்ளனர். அந்த நேரங்களில் இருவரும் நெருக்கமாக இருந்த புகைப்படங்களை சேகர் செல்போனில் எடுத்துவைத்து கொண்டதாக கூறப்படுகிறது. இந்நிலையில், இவர்களது காதல் விவகாரம் பவித்ராவின் வீட்டிற்கு தெரிய வர, அவரது பெற்றோர் உடனே வேறிடத்தில் மாப்பிள்ளை பார்த்து திருமணம் செய்து முடிக்க திட்டம் தீட்டினர். இதனால் சேகருடன் இருந்த பழக்கத்தை முடிவுக்கு கொண்டு வர பவித்ரா முயற்சித்தபோது சேகர் தான் வைத்திருந்த நெருக்கமான புகைப்படங்களை வைத்து பவித்ராவை மிரட்டியுள்ளார்.

மேலும், என்னை தவிர வேறு யாரையும் திருமணம் செய்ய கூடாதெனவும் அச்சுறுத்தியுள்ளார். இதன் பிறகே சேகரை தீர்த்து கட்ட முடிவு செய்தார் பவித்ரா. அதன்படி சம்பவம் நடத்த நாளன்று சேகரை தொடர்பு கொண்டு பேசிய பவித்ரா ' நான் உங்களுக்கு பிறந்தநாள் பரிசு ஒன்று வைத்துள்ளேன். நாம் இருவரும் வெளியில் சென்று வரலாம் என கூறியிருக்கிறார். இதனை கேட்டு பூரிப்படைந்த சேகர், அன்று முழுவதும் பவித்ராவுடன் வெவ்வேறு இடங்களுக்கு சென்று சுற்றி பார்த்து நேரத்தை கழித்துள்ளார். பின்னர் இரவு நேரத்தில் வீட்டிற்கு புறப்பட்டு செல்லும் போது, பைக் புதுவண்ணாரப்பேட்டை துறைமுக குடியிருப்பு அருகே வந்ததும் வண்டியை நிறுத்த சொல்லியிருக்கிறார் பவித்ரா. பின்னர் வண்டியை நிறுத்திய பிறகு கீழே இறங்கிய பவித்ரா ' உங்கள் கண்ணை மூடிக்கொள்ளுங்கள் பிறகு பரிசை தருகிறேன் என்றார். இதையடுத்து அவ்வாறே செய்த சேகரின் கண்களில் பசையை தடவிவிட்டு, கையில் வைத்திருந்த சமையல் கத்தியை கொண்டு சேகரின் கழுத்தை பலமுறை குத்தியுள்ளார். இதையடுத்து ரத்த வெள்ளத்தில் சரிந்து விழுந்த சேகர் சம்பவ இடத்திலேயே உயிரிழந்தார்.

இதனையடுத்து திருவொற்றியூர் போலீசார் பவித்ரா கைது செய்தனர். அதன் பிறகு ஜாமீனில் வெளிவந்த பவித்ரா தாய், தந்தையுடன் வசித்து வந்தார். இந்நிலையில், பவித்ராவின் தந்தை பாஸ்கருக்கு உடல்நிலை பாதிக்கப்பட்டது. அவரை பரிசோதித்ததில் மஞ்சள் காமாலை இருப்பதும், கல்லீரல் கடுமையாக பாதிக்கப்பட்டதுடன் இதயத்தில் துளை இருப்பதாகவும் மருத்துவர்கள் கூறியுள்ளனர். இதனால் மன வேதனையில் இருந்து வந்த பவித்ரா, தந்தையை காப்பாற்றுவதற்காக கடிதம் எழுதிவைத்துவிட்டு தற்கொலை செய்துகொண்டார்.

அந்த கடிதத்தில், '' எனது இதயம் மற்றும் கல்லீரலை தந்தைக்கு தானமாக கொடுத்துவிடுங்கள். நான் உங்களை காப்பாற்றுவேன் அப்பா . எங்கே தேடினாலும் எனக்கு உங்களை மாதிரி அப்பா, அம்மா கிடைக்க மாட்டாங்க . நான் குற்றவாளியோ அல்லது நிரபராதியோ இனிமேல் அதை பற்றி கவலைப்பட தேவையில்லை'' என்று உருக்கமாக தெரிவித்துள்ளார். ஆனால், மருத்துவ விதிப்படி இறந்துபோனவரிடம் இருந்து கண்களை மட்டுமே எடுத்து தானமாக்க முடியும் என்பதால் பவித்ராவின் சடலம் பிரேத பரிசோதனைக்கு அனுப்பப்பட்டுள்ளது. மேலும், இதுகுறித்து வழக்கு பதிவு செய்து போலீசார் விசாரணை நடத்தி வருகின்றனர்.